Ватанимиз мустақиллигининг 34 йиллик байрами арафасида, Ўзбекистон бадиий академиясининг Марказий кўргазмалар залида “Ватан учун, миллат учун, халқ учун!” шиори остида Ўзбекистон рассомларининг асарлари кўргазмаси очилди.
Кўргазма экспозициясидан рангтасвир, графика, ҳайкалтарошлик санъати асарлари ўрин олган.
Ижодкорлар ўзларининг энг сара асарлари орқали гўзал диёримизнинг кўркам кўчалари, тарихий обидалари, ўлкамизнинг кенг водийлари, ўзбек аёлларининг тимсоллари ва бошқа Ватанни тараннум этувчи асарлари билан иштирок этмоқдалар.
Томошабинлар эътиборига машҳур рангтасвирчи рассомларнинг янги ижод асарлари тақдим этилмоқда. Таниқли мўйқалам усталаридан – Хуршид Зияханов, Рустам Худойберганов, Рустам Бозоров, Ли Сафи-Мария, Нозимхўжа Абдусаломхўжаев, Чори Бекмиров, Алишер Насритдинов, Козим Умурзаков, Ахмаджон Оринов, Эркабой Машарипов, Ғайрат Артиков, Дилшод Азизов, Абдумажид Сагатов ва бошқа бир қатор рассомлар ўзларининг беқиёс ва гўзал Ватанимизга бўлган муҳаббатларини ёрқин ва бетакрор буёқлар орқали ифода этган бўлсалар, Аслиддин Каланов, Нусратилло Абдуллаев, Камила Галицкая, Татьяна Коробова ўзларининг графика асарлари билан иштирок этмоқдалар. Ҳайкалтарошлардан Людвига Нестерович ва Ирина Мухаметшиналарнинг ҳайкалтарошлик композиция асарлари кўргазмага келган томошабинларни беэътибор қолдирмайди.
Кўргазмада ёш рассомлардан Анастасия Тилляева, Рушана Алимова, Қодирова Робия, Нигина Жуманазарова, Бехзод Мирвасиловлар ўз асарлари билан иштирок этмоқда.
Кўргазмага ташриф буюрган мухлислар муаллифлар томонидан яратилган 100 га яқин ижод намуналаридан баҳра олиб, Ватанга бўлган муҳаббат ҳамда қалбларида ғурур ва ифтихор туйғулари жунбушга келса ажабмас.
Кўргазма 2025 йилнинг 5 сентябрь ойига қадар давом этади.